ലോകക്ഷേമത്തിനും ലോകശാന്തിക്കും ഏകോദര സഹോദരത്വത്തിനും വേണ്ടിയുള്ള ഒരു ആത്മീയ ധര്‍മ്മ സ്ഥാപനമാണ്

സിദ്ധസമാജം.

ലക്ഷ്യവും പ്രവര്‍ത്തനവും
ലോകക്ഷേമവും ലോകശാന്തിയും ഉണ്ടാകണമെന്നുള്ള മുഖ്യലക്ഷ്യത്തോടു കൂടിയാണ് സമാജം നിലകൊള്ളുന്നത്. ഭയവും കൈക്കൂലിയും ഇല്ലാത്ത, അന്യരെ ആശ്രയിക്കാത്ത ഒരു സ്വതന്ത്ര സമുദായത്തിനെക്കൊണ്ടേ ഇതു സാധ്യമാവുകയുള്ളൂ.

സ്വാമികള്‍ ഭഗീരഥ പ്രയത്നം ചെയ്തു സ്വയം ഈ മഹത്തായ വിദ്യയെ കണ്ടുപിടിച്ച് സ്ഥാപിച്ചു. ഈ വിദ്യ ജീവന്മുക്തി ലഭിക്കുന്നതിനുള്ള മാര്‍ഗ്ഗമാകുന്നു. ഇതു തന്നെ മരണമില്ലാത്ത അനശ്വര ജീവിതത്തിലേയ്ക്കുള്ള വഴിയും മോക്ഷം സിദ്ധിക്കുന്നതിനുള്ള പാതയും ഇതത്രേ. മഹോന്നതമായ ബ്രഹ്മാനന്ദ പ്രാപ്തിക്കുള്ള രാജവീഥിയും ഇതു തന്നെയാണ്. ഈ മാര്‍ഗ്ഗമാണ് “സിദ്ധ വിദ്യ” എന്ന പേരില്‍ ജനങ്ങള്‍ക്കു സ്വാമികള്‍ ഉപദേശിച്ചത്.
ഇതൊന്നു മാത്രമാണ് ലോകജീവിതത്തിലുണ്ടാകുന്ന ദുരിതങ്ങള്‍ക്കു നിവാരണമായിരിക്കുന്നത്. മാത്രമല്ല പക്ഷികളെ പോലെ ജീവിക്കുന്നതിനു അടിസ്ഥാനകാരണമായിരിക്കുന്നതും ഇതുതന്നെ. ബുദ്ധന്‍, യേശു, മുഹമ്മദ് എന്നിവരെപ്പോലുള്ള ഉന്നതരായ ആചാര്യന്‍മാരും പുരാതനരായ ഋഷിമാരും ഇതിനെതന്നെയാണ് ജനങ്ങള്‍ക്ക് ഉത്ബോധനം ചെയ്തിട്ടുള്ളത്. വേദങ്ങള്‍, ഉപനിഷത്തുകള്‍, ബൈബിള്‍, ഖുറാന്‍ മുതലായ മഹത്ഗ്രന്ഥങ്ങള്‍ എല്ലാം ഇതുതന്നെ പഠിപ്പിക്കുന്നു.
ആയതുകൊണ്ടു യാതനകളില്‍ മുങ്ങി നരകിക്കുന്ന മാനവരാശിയിലുണ്ടായ അപരിമിത സഹാനുഭൂതി ഹേതുവാല്‍ സ്വാമികള്‍ പരമോന്നതമായ പ്രസ്തുത ആരാധനാ രീതിയെ ലോകത്തെങ്ങും വ്യാപകമായ തോതില്‍ എടുത്തുപറഞ്ഞ് മനസ്സിലാക്കിച്ചിരുന്നു. അതോടൊപ്പം ആ മഹാത്മാവ് സിദ്ധസമാജം സ്ഥാപിക്കുകയും ചെയ്തു. മനുഷ്യലോകം ഈ വിദ്യയെ അഭ്യസിച്ച് സ്വാമികള്‍ അനുഭവിച്ച അനുപമമായ പരമാനന്ദം കൈവന്ന് മോക്ഷം പ്രാപിക്കുന്നതിനുള്ള വഴികാണിക്കുന്ന സ്ഥാപനമാണിത്.

ഇപ്രകാരം സമാജം ഭയവും കൈക്കൂലിയും പരാശ്രയവും ഇല്ലാത്ത ചെറിയ തോതിലുള്ള ഒരു സ്വതന്ത്ര സമുദായമായി നിലകൊള്ളുന്നു. സമാവകാശ സിദ്ധാന്തം അനുസരിച്ചു കഴിയുന്ന ഒരു സമൂഹത്തില്‍ എത്തിച്ചേരുന്നതിനു യോജിച്ച മുഖ്യമാര്‍ഗ്ഗത്തെ അത് പ്രയോഗ തലത്തില്‍ എടുത്തു കാണിക്കുന്നു. സമാജ നിലനില്പു തന്നെ ധര്‍മ്മത്തിന്‍റെ മൂര്‍ത്തീഭാവമായാണ്. മാത്രമല്ല അത് നിലനിന്നുപോരുവാനും തനതാദര്‍ശങ്ങളെ അനുഷ്ഠാനത്തില്‍ കൊണ്ടുവരുവാനും പ്രചാരണത്തിനും ആയി സമാജാംഗങ്ങളുടെ കഠിനാദ്ധ്വാനത്തില്‍ നിന്നും ലഭിക്കുന്ന വരുമാനം പ്രയോജനപ്പെടുത്തിയും വരുന്നു.

സഹോദര സ്നേഹം അഥവാ സഹോദര വിശ്വാസം കുറഞ്ഞുപോയതു കൊണ്ട് ജനങ്ങള്‍ ഭയത്തിനും ചൂഷണത്തിനും ഇരയായി കുടുംബ ബന്ധങ്ങളെന്ന കൃത്രിമ പരാധീനതകളില്‍ മുങ്ങി കഷ്ടത അനുഭവിക്കുന്നു. തന്നിമിത്തം സഹോദര സ്നേഹം, സഹോദരങ്ങളിലുള്ള വിശ്വാസം, സാര്‍വ്വലൗകിക സാഹോദര്യം തുടങ്ങിയ സദ്ഗുണങ്ങളെ ഊട്ടി വളര്‍ത്തുന്നതു തന്നെ സ്വന്തം ലക്ഷ്യമായി സമാജം സ്വീകരിച്ചിരിക്കുന്നു. ഭര്‍ത്താവ്, ഭാര്യ, മകന്‍, മകള്‍ എന്നിങ്ങനെയുള്ള കുടുംബ ബന്ധങ്ങള്‍ ഒന്നും സമാജത്തില്‍ ഇല്ല. എല്ലാവരും ഒരമ്മയുടെ കുഞ്ഞുങ്ങള്‍; എല്ലാവരും സഹോദരങ്ങള്‍.

സമാജത്തിനു ആസ്തിയായുള്ളത് അതിന്‍റെ ഭൂമി മാത്രമാണ്. ആ ഭൂമി പ്രത്യേകിച്ചു ഒരു വ്യക്തിക്കും അവകാശപ്പെട്ടതല്ല. എന്നാല്‍ സമാജത്തില്‍ ഇന്നുള്ളവര്‍ക്കും ജാതിമത ഭേദമില്ലാതെ ഒരമ്മ പെറ്റ മക്കളെപ്പോലെ ഒന്നായിച്ചേര്‍ന്നു അദ്ധ്വാനിക്കുന്നതിനു ഇഷ്ടമുള്ളവരായി അന്നന്നു ഇവിടെ വന്നു ചേരുന്നവര്‍ക്കും പൊതുവാണ്.
വ്യക്തിഗതാവകാശമാണ് എല്ലാ കഷ്ടപ്പാടുകള്‍ക്കും മൂലകാരണം. ആയതിനാല്‍ സ്വത്തു സമാജത്തിലുള്ള എല്ലാവര്‍ക്കും പൊതുവായതെന്നു വച്ചിരിക്കുന്നു. സമാജം വക സ്വത്തിനെയാതൊരാളാലും ദുരുപയോഗപ്പെടുത്താനോ, ഒറ്റികൊടുക്കാനോ, അല്ലെങ്കില്‍ പണയം വയ്ക്കാനോ, വില്‍ക്കാനോ സാദ്ധ്യമല്ല. സമാജത്തില്‍ സാമ്പത്തികലാഭത്തെ നോട്ടമിട്ടുള്ള പ്രവര്‍ത്തനങ്ങള്‍ യാതൊന്നും തന്നെ ഇല്ല. ധനസമ്പാദനത്തിനു വേണ്ടി വ്യാപാര രീതിയില്‍ ഒന്നും ചെയ്യുന്നുമില്ല. ലോകത്തിനു അനുകരിക്കാന്‍ പറ്റുന്ന ഒരു മാതൃകയായിരിക്കുന്നതിനും സ്വാവലംബനപര്യാപ്തത നേടുന്നതിനുമായി സമാജം ഓരോരോ പ്രവൃത്തികളെയും ചെയ്തുവരുന്നു.

ഉയര്‍ന്ന സദാചാരവും അച്ചടക്കവും കൊണ്ടേ കൈക്കൂലി കടന്നു കൂടാത്ത ഒരു ജീവിതം ലക്ഷ്യമിടുവാന്‍ സാദ്ധ്യമാവുകയുള്ളൂ. ആയതുകൊണ്ട് സമാജത്തില്‍ കര്‍ശനമായ അച്ചടക്കം പാലിക്കപ്പെടുന്നു. ദിവസേന ജപത്തിനു വേണ്ടി മാത്രം 8 മണിക്കൂര്‍ സമയം നീക്കിവച്ചിരിക്കുന്നു. അതിരാവിലെ 3 മണി മുതല്‍ 5.20 വരെയും ഉച്ചക്കു 12 മുതല്‍ 2.20 വരെയും വൈകുന്നേരം 6 മുതല്‍ 7 വരെയും രാത്രി 7.30 മുതല്‍ 9.50 മണി വരെയും ജപം നടന്നു വരുന്നു. ബാക്കി സമയം ഉപജീവനത്തിനു വേണ്ടിയുള്ള
ഭക്ഷണം സസ്യാഹാരമായിരിക്കണമെന്നത് നിര്‍ബന്ധമാണ്. മദ്യപാനവും, കഞ്ചാവ്, അഫിന്‍ (കറുപ്പ്) പോലുള്ള ലഹരി പദാര്‍ത്ഥങ്ങളും ബീഡി, ചുരുട്ട്, സിഗററ്റ്, മൂക്കുപൊടി, പുകയില, പാക്ക്, ചുണ്ണാമ്പ്, തേയില, പുളി, കടുക് മുതലായ വസ്തുക്കളും പൂര്‍ണ്ണമായും ഒഴിവാക്കപ്പെട്ടിരിക്കുന്നു. തന്‍റെ പേരോടു കൂടി ജാതിപ്പേരോ, ഉദ്യോഗപ്പേരോ ചേര്‍ക്കാന്‍ പാടില്ല. അന്ധവിശ്വാസങ്ങള്‍, ശേഷക്രിയ സംബന്ധിച്ച ചടങ്ങുകള്‍ എന്നിവ വിലക്കപ്പെട്ടിരിക്കുന്നു. ലളിതവും ശുദ്ധവുമായ വെള്ള വസ്ത്രങ്ങളല്ലാതെ കുപ്പായം, കാല്‍ച്ചട്ട മുതലാ യ വര്‍ണ്ണ വസ്ത്രങ്ങളും ഉപയോഗിക്കുവാന്‍ പാടില്ല. മുടി മുറിക്കാനോ ക്ഷൗരം (ഷേവ്) ചെയ്യാനോ പാടില്ലാത്തതാണ്. മതം ഈശ്വരമതവും ജാതി മനുഷ്യജാതിയുമാകുന്നു. ചുരുക്കിപ്പറഞ്ഞാല്‍ സമാജം പ്രകൃതിയോടിണങ്ങുന്ന ഒരു ജീവിതമാണ് നയിക്കേണ്ടത്.

സമാജത്തിലെ കുട്ടികള്‍ക്കായി ഹെഡോഫീസില്‍ താമസ സൗകര്യങ്ങളോടു കൂടിയ ഒരു വിദ്യാലയം നടത്തി വരുന്നു. അവിടത്തെ പഠനം പൂര്‍ത്തിയായതിനു ശേഷം അവര്‍ വീണ്ടും സിദ്ധാശ്രമങ്ങളിലേയ്ക്ക് പറഞ്ഞയക്കപ്പെടുന്നു.

സിദ്ധസമാജം ലോകശരണാലയമായിരിക്കുന്നു. ദുരിതങ്ങള്‍ അനുഭവിച്ചു കൊണ്ടിരിക്കുന്ന ലോകവാസികള്‍ തങ്ങളുടെ ജീവിതത്തിനു സംരക്ഷ നേടുന്ന ഇടമാണ് ഇത്. പക്ഷികളെപ്പോലെ യാതൊരുവിധ ബന്ധങ്ങളുമില്ലാത്ത ജീവിതം അനുഭവിക്കുന്ന സങ്കേതം. പക്ഷികള്‍ ജന്മനാല്‍ എപ്പോഴും മേല്‍പോട്ടുള്ള ശ്വാസഗതി (ഊര്‍ദ്ധ്വഗതി) ഉള്ളവയാണ്. പ്രസ്തുത ശ്വാസഗതി നമുക്കു ഉറങ്ങുമ്പോള്‍ മാത്രമേ ഉള്ളൂ. സിദ്ധവിദ്യ അഭ്യസിച്ചു കൊണ്ടിരുന്നാല്‍ മാത്രമേ ഒരാളിന് അത് നേടുവാന്‍ കഴിയൂ.
നാം നമ്മുടെ മനസ്സിനെ സദാ സമയവും മുകളിലേക്ക് വച്ചു കൊള്ളേണ്ടതാണ്. എന്തുതന്നെ ചെയ്താലും അത് താമരയിലയിലെ വെള്ളം പോലെ പറ്ററ്റു ഏകഗതിയായി അതായത് ജീവന്‍റെ മേല്‍ ഗതിയോടുകൂടി ചെയ്യേണ്ടതാകുന്നു. സത്യത്തോടു എന്നെന്നും ജീവിച്ചിരിക്കേണ്ടുന്ന മാര്‍ഗ്ഗം മറഞ്ഞുപോയതു കൊണ്ടുതന്നെയാണ് അധ:പതനോന്മുഖമായ ലോകജീവിതത്തില്‍ മനുഷ്യവംശം തങ്ങളെ നഷ്ടപ്പെടുത്തിയിരിക്കുന്നത്. യഥാര്‍ത്ഥവും പ്രകൃത്യാലുള്ളതുമായ പൊതുവുടമാവകാശാദര്‍ശങ്ങളെയും അവര്‍ വിസ്മരിച്ചിരിക്കുന്നു. ലോകം ഇന്നു നേരിടുന്ന എ

കുട്ടികള്‍, രോഗികള്‍, പുറമെ പോയിരിക്കുന്നവര്‍ എന്നിവരൊഴികെ മറ്റാരും പ്രത്യേകം ഇരുന്നു ആഹാരം കഴിക്കുവാന്‍ പാടില്ല. സിദ്ധവിദ്യ അഭ്യസിക്കുന്നവര്‍ എല്ലാം സഗ്ദ്ധി സപീതി ആചരിക്കേണ്ടതാകുന്നു. കട്ടിയുള്ള ഭക്ഷണപദാര്‍ത്ഥങ്ങളെ ഒരുമിച്ചു കലര്‍ത്തി ഒരു പാത്രത്തിലോ ഇലയിലോ വിളമ്പി എല്ലാവരും ഒന്നായിരുന്നു അതില്‍ നിന്നും എടുത്തു കഴിക്കുന്നതാണ് സഗ്ദ്ധി. ഇപ്രകാരം തന്നെ ജലമയമായ പദാര്‍ത്ഥങ്ങളെ ഉള്‍ക്കൊള്ളുന്നത് സപീതിയും ആകുന്നു. ഇങ്ങനെ സമാജക്കാര്‍ പൊതുവായും സമത്വമായും ഭക്ഷണം കഴിക്കുന്നു.

സമാജം നിറവേറ്റി വരുന്ന അത്യുന്നതങ്ങളായ ധര്‍മ്മപ്രവര്‍ത്തനങ്ങളില്‍ ഒന്നാണ് അന്നദാനം. പാവങ്ങളും എളിയവരും ഉള്‍പ്പെടെ തല്‍സമയം വന്നിരിക്കുന്ന പുറമെ ഉള്ളവര്‍ക്കും എല്ലാവര്‍ക്കും ഭക്ഷണം കൊടുത്തതിനു ശേഷമേ ആശ്രമക്കാര്‍ കഴിക്കാറുള്ളൂ. ആരെങ്കിലും വിശന്നുവന്നാല്‍ ആ സമയം ഭക്ഷണം തയ്യാറാക്കിയതില്‍ ഇല്ലെങ്കില്‍ ഉടനെഅതുണ്ടാക്കി അവര്‍ക്കു കൊടുക്കുവാന്‍ സമാജക്കാര്‍ കടപ്പെട്ടവരാണ്.

സിദ്ധവിദ്യാര്‍ത്ഥികള്‍ക്കു മാത്രമേ ഇവിടെ താമസിക്കാന്‍ അനുവാദമുള്ളൂ. മറ്റുള്ളവര്‍ക്കു പകല്‍ സമയത്തു ആശ്രമം സന്ദര്‍ശിക്കാം. പക്ഷെ രാത്രി താമസിക്കാന്‍ അനുവാദമില്ല.
സന്ദര്‍ശനസമയം :- 9:00 അങ മുതല്‍ 11:00 അങ 3:00 ജങ മുതല്‍ 5:00 ജങ

സഹോദരങ്ങളെ,
കുഴപ്പവും പോരാട്ടവും ദുരിതവും നിറഞ്ഞ ഈ കാലത്ത് സമാജ ജീവിത രീതി സ്വീകരിച്ചു ഏകോദര സഹോദരത്വം വളര്‍ത്തി, ഈ ലോകത്തില്‍ ജീവിത സംരക്ഷ നേടി ലോകക്ഷേമവും ലോക സമാധാനവും കൈവരുത്തി, അതുവഴി ഉന്നതമായ ബ്രഹ്മാനന്ദം പ്രാപിച്ച് സന്തുഷ്ടരായി ജീവിക്കുന്നതിലേയ്ക്ക് ലോകത്തിലെ ഓരോ പ്രജയോടും സമാജം സര്‍വ്വാത്മനാ കെഞ്ചുന്നു.
നമുക്ക് നമ്മുടെ ജീവിതം പാവനവും പരിശുദ്ധവുമാക്കാം. ആത്മീയവഴിയില്‍ സഞ്ചരിക്കുമ്പോഴും ലോകത്തിന്‍റെ ഭൌതീകതലത്തെ നമുക്കു മറക്കാതിരിക്കാം. നമ്മുടെ ആശ്രമത്തെ, അലഞ്ഞുനടക്കുന്ന മടിയന്മാര്‍ക്കു വേണ്ടിയല്ല, ചവിട്ടിമെതിക്കപ്പെട്ട പാവങ്ങള്‍ക്കുവേണ്ടി ജീവകാരുണ്യത്തിന്‍റെ വീടാക്കിമാറ്റാം. നമുക്കു പ്രവര്‍ത്തിച്ചുകൊണ്ടേയിരിക്കാം, അതേ അവസരത്തില്‍ ആവശ്യമുള്ളവര്‍ക്കു പ്രവൃത്തികൊടുക്കുകയും ചെയ്യാം. നാം നമ്മളെ ഊട്ടുന്നതുപോലെ മറ്റുള്ളവരെയും ഊട്ടാം. രോഗികളെയും മുറിവേറ്റവരെയും നമ്മുക്ക് പരിചരിക്കാം. എല്ലാറ്റിനും പുറമെ നമുക്ക് എപ്പോഴും ശുഭാപ്തി വിശ്വാസമുള്ളവരും സന്തുഷ്ടരുമായിരിക്കാം. അനാവശ്യചിന്തകള്‍ കൊണ്ട് നമുക്ക് മനസ്സിന്‍റെ ഭാരം കൂട്ടാതിരിക്കാം. ഇതാണ് നമ്മുടെ സിദ്ധസമാജ സ്ഥാപകരായ സ്വാമിശിവാനന്ദ പരമഹംസര്‍ നമ്മെ പഠിപ്പിക്കുന്നത്. അതനുസരിക്കുന്നത് നമ്മുടെ കടമയാണ്.

ഓം ശാന്തി! ശാന്തി!! ശാന്തി!!!